പ്രിയപ്പെട്ട യൂട്യൂബറെ കാണാന്‍ പഞ്ചാബിലെ പട്യാലയില്‍നിന്ന് ഡല്‍ഹിയിലേക്ക് 250 കിലോമീറ്ററിലേറെ ദൂരം സൈക്കിള്‍ ചവിട്ടിയെത്തി 13 വയസുകാരന്‍. യൂട്യൂബില്‍ ‘ട്രിഗര്‍ഡ് ഇന്‍സാന്‍’ എന്ന പേരിലറിയപ്പെടുന്ന നിശ്ചയ് മല്‍ഹാന്റെ പിതാംബുരയിലെ അപ്പാര്‍ട്ട്മെന്റിലേക്കാണ് കുട്ടി സൈക്കിള്‍ ചവിട്ടിയെത്തിയത്. എന്നാല്‍ നിശ്ചയ് ദുബായിലേയ്ക്ക് യാത്രതിരിച്ചതിനാല്‍ വീട്ടിലുണ്ടായിരുന്നില്ലെന്ന് പോലീസ് അറിയിച്ചു.
എട്ടാം ക്ലാസ് വിദ്യാര്‍ഥിയായ കുട്ടിയെ ഒക്ടോബര്‍ നാലിനാണ് കാണാതാകുന്നത്. 1.7 കോടി സബ്സ്‌ക്രൈബര്‍മാരുള്ള ട്രിഗര്‍ഡ് ഇന്‍സാന്‍ എന്ന കോമഡി ചാനലിന്റെ വലിയ ആരാധകനാണ് കുട്ടി. കുട്ടിയെ കാണാനില്ലെന്ന വാർത്ത വന്നതോടെ യൂട്യൂബറും വിവരങ്ങള്‍ ആരായുകയും സാമൂഹിക മാധ്യമത്തിലൂടെ കുട്ടിയോട് വീട്ടുകാരോട് ബന്ധപ്പെടാന്‍ ആവശ്യപ്പെടുകയും ചെയ്തിരുന്നു. ഡൽഹി പൊലീസും പട്യാല പൊലീസും ചേർന്ന് നടത്തിയ അന്വേഷണത്തിൽ കുട്ടിയെ തിരിച്ചുകിട്ടി. മൂന്നു ദിവസത്തെ കഠിനപരിശ്രമം നടത്തിയെങ്കിലും തന്റെ പ്രിയപ്പെട്ട യൂട്യൂബറെ കാണാനുള്ള ഭാഗ്യം കുട്ടിക്കുണ്ടായില്ല.
