ഇക്കോ, റൈഡ്, സ്‌പോര്‍ട്ട് എന്നീ മൂന്ന് റൈഡിങ്ങ് മോഡുകളുള്ള ഈ സ്‌കൂട്ടറുകളില്‍ മണിക്കൂറില്‍ പരമാവധി 80 കിലോമീറ്റര്‍ വേഗത എടുക്കാനുള്ള കരുത്താണ് നല്‍കിയിട്ടുള്ളത്.
ഇന്ത്യൻ നിരത്തുകളിൽ ഇന്നോളമെത്തിയ ഇലക്ട്രിക് സ്കൂട്ടറുകളെയെല്ലാം കടത്തിവെട്ടുന്ന റേഞ്ചും സാങ്കേതിക സംവിധാനങ്ങളുമായി ലോകത്തിലെ തന്നെ ഏറ്റവും വലിയ ഇരുചക്ര വാഹന നിർമാതാക്കളായ ഹീറോ മോട്ടോകോർപ്. വിഡ എന്ന ബ്രാന്റിന് കീഴിൽ വി വൺ പ്ലസ്, വി വൺ പ്രോ എന്നീ രണ്ട് സ്കൂട്ടറുകളുമായാണ് ഹീറോയും ഇലക്ട്രിക് ഇരുചക്രങ്ങളുടെ വിപണിയിലേക്ക് ചുവടുവെച്ചിരിക്കുന്നത്. ഹീറോ മോട്ടോകോർപിന്റെ അനുബന്ധ ബ്രാന്റായാണ് വിഡ ഒരുക്കിയിരിക്കുന്നത്.
ഹീറോയുടെ ഇലക്ട്രിക് സ്കൂട്ടർ നിരയിലെ അടിസ്ഥാന മോഡലായ വി വൺ പ്ലസിന് 1.45 ലക്ഷം രൂപയും ഉയർന്ന വകഭേദമായ വി വൺ പ്രോയിക്ക് 1.59 ലക്ഷം രൂപയുമാണ് എക്സ്ഷോറൂം വില. എന്നാൽ, ആദ്യ ഘട്ടത്തിൽ ബെംഗളൂരു, ഡൽഹി, ജയ്പൂർ തുടങ്ങിയ നഗരങ്ങളിലായിരിക്കും ഈ സ്കൂട്ടറിന്റെ വിൽപ്പന. ഡിസംബർ മാസത്തോടെ വിതരണം ആരംഭിക്കുന്ന ഈ സ്കൂട്ടറിന്റെ ബുക്കിങ്ങ് ഒക്ടോബർ പത്താം തീയതിയാണ് ആരംഭിച്ചത്. 2499 രൂപയാണ് അഡ്വാൻസ് തുകയായി ഈടാക്കുന്നത്.
ലളിതമായ ഡിസൈനിങ്ങിൽ ഇരട്ട നിറങ്ങളോടെയാണ് വിഡ വി വൺ സ്കൂട്ടറുകൾ ഒരുങ്ങിയിരിക്കുന്നത്. മുന്നിലെ ഏപ്രണിന്റെ താഴെയായി സ്ഥാനം പിടിച്ചിരിക്കുന്ന എൽ.ഇ.ഡിയിൽ ഒരുങ്ങിയിട്ടുള്ള ഹെഡ്ലാമ്പും ഡി.ആർ.എല്ലും, ഇരട്ട നിറത്തിൽ അലങ്കരിച്ചിട്ടുള്ള മുൻഭാഗം, അലോയി വീൽ, ചെറിയ ഫെൻഡർ, സ്മാർട്ട് ഡിസ്പ്ലേ ഇൻസ്ട്രുമെന്റ് ക്ലെസ്റ്റർ, ചെറിയ വിൻഡ് സ്ക്രീൻ, സ്റ്റൈലായി നൽകിയിട്ടുള്ള സീറ്റ്, ഗ്രാബ് റെയിൽ, എൽ.ഇ.ഡി. ടെയ്ൽലാമ്പ് എന്നിവയാണ് ഈ വാഹനത്തിന് അഴകേകുന്നത്.
സാങ്കേതികവിദ്യയിൽ ഏറെ മുന്നിലാണ് ഹീറോയുടെ ഇലക്ട്രിക് സ്കൂട്ടറുകൾ. സ്മാർട്ട് ഫോണുകളിൽ കാണുന്നതിന് സമാനമായി ഏഴ് ഇഞ്ച് വലിപ്പമുള്ള സ്ക്രീനാണ് ഇൻസ്ട്രുമെന്റ് ക്ലെസ്റ്ററായി നൽകിയിട്ടുള്ളത്. സ്പീഡ്, റേഞ്ച്, ടൈം, ചാർജിങ്ങ് ടൈം, നാവിഗേഷൻ തുടങ്ങിയ സംവിധാനങ്ങലാണ് ഇതിലുള്ളത്. കീലെസ് കൺട്രോൾ വിത്ത് ഫോളോ മീ ഫങ്ഷൻ, ബൂസ്റ്റ് മോഡിന്റെ സഹായത്തോടെയുള്ള ടൂവേ ത്രോട്ടിൽ, എസ്.ഒ.എസ്. അലേർട്ട് ഫങ്ഷൻ തുടങ്ങിയവയും ഈ ഇലക്ട്രിക് സ്കൂട്ടറുകളിലുണ്ട്.
റേഞ്ചിനും ഏറെ മുന്നിലാണ് ഹീറോയുടെ ഇലക്ട്രിക് സ്കൂട്ടറുകൾ. വിഡ വി വൺ പ്ലസ് ഒറ്റത്തവണ ചാർജ് ചെയ്താൽ 143 കിലോമീറ്റർ യാത്ര ചെയ്യാൻ സാധിക്കുമെന്നാണ് നിർമാതാക്കൾ അവകാശപ്പെടുന്നത്. അതേസമയം, വി വൺ പ്രോ 165 കിലോമീറ്റർ റേഞ്ചും ഉറപ്പുനൽകുന്നുണ്ട്. വി വൺ പ്ലസിൽ 3.44 കിലോവാട്ട് ബാറ്ററിയും വി വൺ പ്രോയിൽ 3.94 കിലോവാട്ട് ബാറ്ററിയുമാണ് ഈ ഇലക്ട്രിക് സ്കൂട്ടറുകളിൽ നൽകിയിരിക്കുന്നത്. ആറ് വാട്ട് ഇലക്ട്രിക് മോട്ടോറാണ് ഇതിൽ പ്രവർത്തിക്കുന്നത്.
ഇക്കോ, റൈഡ്, സ്പോർട്ട് എന്നീ മൂന്ന് റൈഡിങ്ങ് മോഡുകളുള്ള ഈ സ്കൂട്ടറുകളിൽ മണിക്കൂറിൽ പരമാവധി 80 കിലോമീറ്റർ വേഗത എടുക്കാനുള്ള കരുത്താണ് നൽകിയിട്ടുള്ളത്. എന്നാൽ, വി വൺ പ്രോ 3.2 സെക്കന്റിലും വി വൺ പ്ലസ് 3.4 സെക്കന്റിലും 40 കിലോമീറ്റർ വേഗത കൈവരിക്കും. ഒല എസ് 1, ബജാജ് ചേതക്, ടി.വി.എസ്. ഐക്യൂബ്, ഏഥർ 450 എക്സ് എന്നീ നാല് ഇലക്ട്രിക് സ്കൂട്ടറുകളുമായാണ് ഹീറോയുടെ വിഡ ഇലക്ട്രിക് സ്കൂട്ടറുകൾ മത്സരിക്കുന്നത്.
