ബി ജെ പി സീറ്റ് നിഷേധിച്ചാൽ രാജസ്ഥാൻ നിയമസഭ തിരഞ്ഞെടുപ്പിൽ വസുന്ധര രാജെ കോൺഗ്രസിനെ പിന്തുണച്ചേക്കും. വസുന്ധര രഹസ്യമായാ പരസ്യമായോ പിന്തുണച്ചേക്കാമെന്ന് അശോക്ഗെലോട്ട് ഹൈക്കമാന്റിനെ അറിയിച്ചു. വസുന്ധരയുടെ നീക്കങ്ങളെ കുറിച്ച് അറിയില്ലെന്നും ശക്തമായ പ്രതിപക്ഷമാകുന്നതിൽ ബിജെപി പരാജയപ്പെട്ടെന്നുo സച്ചിൻ പൈലറ്റ് മാധ്യമങ്ങളോട് പറഞ്ഞു.
രാജസ്ഥാനിൽ ബിജെപിക്ക് അടിത്തറ ഉണ്ടാക്കിയ നേതാവാണ് വസുന്ധര രാജെ. എന്നാൽ ഇതുവരെയുള്ള സ്ഥാനാർഥി പ്രഖ്യാപനത്തിൽ വസുന്ധരക്ക് സീറ്റില്ല. പാർട്ടിയുടെ പഴയ പടക്കുതിരയെ ബിജെപി തഴഞ്ഞമട്ടാണ്. ബിജെപി ഇല്ലാതാക്കാൻ തുനിഞ്ഞാൽ നിലവിലെ മുഖ്യമന്ത്രി അശോക് ഗെലോട്ടിനെ സഹായിച്ച് പ്രതികാരം തീർക്കാനാണ് വസുന്ധര രാജെ വിഭാഗത്തിന്റെ നീക്കം. ഗെലോട്ടുമായുള്ള അടുപ്പം വസുന്ധര രാജെക്ക് കോൺഗ്രസ് ബന്ധം എളുപ്പമാക്കാം. സച്ചിൻ പൈലറ്റ് വിമത സ്വരം ഉയർത്തിയപ്പോൾ സർക്കാർ വീഴാതിരിക്കാൻ വസുന്ധരയുടെ രഹസ്യസഹായം ഗെലോട്ട് തേടിയിരുന്നു. ഇത് അറിയാവുന്ന സച്ചിൻ പൈലറ്റ് വസുന്ധരയുടെ കോൺഗ്രസ് ചായ്‌വ് അറിയില്ലെന്ന് പറഞ്ഞൊഴിയുകയാണ്.
ഭരണവിരുദ്ധ വികാരം ശക്തമായുള്ള രാജസ്ഥാനിൽ ഭരണ തുടർച്ച എളുപ്പമല്ലെന്നാണ് കോൺഗ്രസ് ഹൈക്കമാന്റിന് ലഭിച്ചിരിക്കുന്ന റിപ്പോർട്ട്. സ്ഥാനാർഥി പ്രഖ്യാപനം വരുവോൾ സച്ചിൻ ഇടഞ്ഞാലും വസുന്ധര ഫാക്ടർ ഗുണകരമാകുമെന്നാണ് കണക്ക് കൂട്ടൽ. എന്നാൽ ഇതെല്ലാം ബിജെപി സ്ഥാനാർഥി പട്ടികയെ ആശ്രയിച്ചിരിക്കും
