ഫുൾചാർജ്ജിൽ 500 കിമി; ഒപ്പം ഭൂതകാലത്തിന്‍റെ മധുരസ്‍മരണകളും; ടാറ്റ ഫാൻസ് ഹാപ്പി, പുതിയ സിയറ ഇവി ഉടനെത്തും
ടാറ്റ മോട്ടോഴ്‌സ് തങ്ങളുടെ ‘സിയറ’യെ ഇലക്ട്രിക്ക് രൂപത്തിൽ തിരികെ കൊണ്ടുവരുന്നു. ടാറ്റ സിയറ ഇവിയുടെ പ്രൊഡക്ഷൻ മോഡൽ 2025 ലെ ഇന്ത്യ മൊബിലിറ്റി എക്‌സ്‌പോയിൽ അവതരിപ്പിക്കും. ഇലക്ട്രിക്, ഐസിഇ (ഇൻ്റേണൽ കംബസ്‌ഷൻ എഞ്ചിൻ) ഓപ്ഷനുകളോടെ 2025 പകുതിയോടെ ഈ വാഹനം ഇന്ത്യയിൽ ലഭ്യമായേക്കാം. അതിൻ്റെ വിശദാംശങ്ങൾ നമുക്ക് വിശദമായി അറിയാം. ഡിസൈൻ കഴിഞ്ഞ ഓട്ടോ എക്‌സ്‌പോയിൽ കാണിച്ച ആശയത്തിൻ്റെ ഏതാണ്ട് അതേ ഡിസൈൻ തന്നെയാണ് സിയറയുടെ പ്രൊഡക്ഷൻ മോഡലിവും ലഭിക്കുന്നത്. സ്‌റ്റൈലിങ്ങിൽ കാര്യമായ മാറ്റങ്ങളൊന്നും വരുത്തിയിട്ടില്ലെന്ന് ടെസ്റ്റിങ്ങിനിടെ കണ്ട മോഡലിൽ നിന്ന് വ്യക്തമാണ്. സിയറ ഇവിയുടെ രൂപകൽപ്പന അതിൻ്റെ ICE വേരിയൻ്റിൽ നിന്ന് അല്പം വ്യത്യസ്തമായിരിക്കും. പ്രത്യേകിച്ച് ഇവി വേരിയൻ്റിന് സവിശേഷമായ സ്റ്റൈലിംഗ് ഘടകങ്ങൾ ഉണ്ടായിരിക്കും. പഴയ സിയറയുടെ വലിയ പിൻ ഗ്ലാസ് പുതിയ സിയറയിൽ പൂർണമായി നിലനിർത്തിയിട്ടില്ല, എന്നാൽ അത് നൂതനമായ ഡിസൈനോടെയാണ് വീണ്ടും അവതരിപ്പിച്ചിരിക്കുന്നത്. സവിശേഷതകളും ഇൻ്റീരിയറും ടാറ്റ മോട്ടോഴ്‌സ് സിയറ ഇവിയെ കമ്പനിയുടെ ഏറ്റവും നൂതന സാങ്കേതിക വിദ്യയുള്ള കാറായി കണക്കാക്കുന്നു. നിരവധി വിപുലമായ ഫീച്ചറുകൾ ഇതിൽ നൽകും. പനോരമിക് സൺറൂഫ്, വെൻ്റിലേറ്റഡ് സീറ്റുകൾ, ഡ്യുവൽ സോൺ ക്ലൈമറ്റ് കൺട്രോൾ, ലെവൽ 2 ADAS (അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം) തുടങ്ങിയ ഫീച്ചറുകൾ ഇതിൽ കാണാം. ഇതിനുപുറമെ, ഡ്രൈവർക്കും യാത്രക്കാർക്കും മികച്ച അനുഭവം നൽകുന്ന ഇരട്ട ഇൻഫോടെയ്ൻമെൻ്റ് ഡിസ്പ്ലേ സജ്ജീകരണവും ഇതിന് ഉണ്ടായിരിക്കാം. പവർട്രെയിനും പ്രകടനവും ടാറ്റയുടെ ആക്ടി ഡോട്ട് ഇവി പ്ലാറ്റ്‌ഫോമിനെ അടിസ്ഥാനമാക്കിയായിരിക്കും സിയറ ഇവി. പ്ലാറ്റ്‌ഫോമിന് ഓൾ-വീൽ ഡ്രൈവ് (AWD), റിയർ-വീൽ ഡ്രൈവ് (RWD) ഓപ്ഷനുകൾ വാഗ്ദാനം ചെയ്യാൻ കഴിയും. ടാറ്റ മോട്ടോഴ്‌സ് ഇതുവരെ ബാറ്ററി സവിശേഷതകൾ വെളിപ്പെടുത്തിയിട്ടില്ലെങ്കിലും, ഈ ഇവി സിംഗിൾ, ഡ്യുവൽ മോട്ടോർ കോൺഫിഗറേഷനുമായി വരുമെന്നാണ് റിപ്പോർട്ടുകൾ. സിയറ ഇവി ഒറ്റ ചാർജിൽ 500 കിലോമീറ്റർ സഞ്ചരിക്കും എന്നാണ് റിപ്പോർട്ടുകൾ.
