ലക്‌നൗ: ഐപിഎല്ലില്‍ മുംബൈ ഇന്ത്യന്‍സിന് മൂന്നാം തോല്‍വി. ഇന്ന് ലക്‌നൗ സൂപ്പര്‍ ജയന്റ്‌സിനെതിരായ മത്സരത്തില്‍ 12 റണ്‍സിനായിരുന്നു മുംബൈയുടെ തോല്‍വി. 204 റണ്‍സ് വിജയലക്ഷ്യം പിന്തുടര്‍ന്ന് മുംബൈ ഇന്ത്യന്‍സിന് നിശ്ചിത ഓവറില്‍ അഞ്ച് വിക്കറ്റ് നഷ്ടത്തില്‍ 191 റണ്‍സെടുക്കാനാണ് സാധിച്ചത്. സൂര്യകുമാര്‍ യാദവ് (43 പന്തില്‍ 67), നമന്‍ ധിര്‍ (24 പന്തില്‍ 46) എന്നിവരാണ് മുംബൈ ഇന്നിംഗ്‌സില്‍ തിളങ്ങിയത്. നേരത്തെ, ടോസ് നഷ്ടപ്പെട്ട് ബാറ്റിംഗിനെത്തിയ ലക്‌നൗവിനെ മിച്ചല്‍ മാര്‍ഷ് (31 പന്തില്‍ 60), എയ്ഡന്‍ മാര്‍ക്രം (38 പന്തില്‍ 53) എന്നിവരുടെ ഇന്നിംഗ്‌സുകളാണ് മികച്ച സ്‌കോറിലേക്ക് നയിച്ചത്. എട്ട് വിക്കറ്റുകള്‍ ആതിഥേയര്‍ക്ക് നഷ്ടമായി. ഹാര്‍ദിക് പാണ്ഡ്യ അഞ്ച് വിക്കറ്റ് വീഴ്ത്തി. മലയാളി താരം വിഘ്‌നേഷ് പുത്തൂര്‍ നാല് ഓവറില്‍ 31 റണ്‍സ് മാത്രം വഴങ്ങി ഒരു വിക്കറ്റെടുത്തു. തുടക്കത്തില്‍ രണ്ട് വിക്കറ്റുകള്‍ മുംബൈക്ക് നഷ്ടമായെങ്കിലും പവര്‍ പ്ലേയില്‍ തന്നെ കരകയറാന്‍ മുംബൈക്ക് സാധിച്ചിരുന്നു. ഒരു ഘട്ടത്തില്‍ രണ്ടിന് 17 എന്ന നിലയിലായിരുന്നു മുംബൈ. ഓപ്പണര്‍മാരായ വില്‍ ജാക്‌സ് (5), റ്യാന്‍ റിക്കള്‍ട്ടണ്‍ (10) എന്നിവരുടെ വിക്കറ്റുകളാണ് മുംബൈക്ക് നഷ്ടമായത്. ആകാശ് ദീപ്, ഷാര്‍ദുല്‍ താക്കൂര്‍ എന്നിവര്‍ക്കാണ് വിക്കറ്റുകള്‍. പിന്നീട്, സൂര്യ-നമന്‍ സഖ്യം മുംബൈയുടെ രക്ഷയ്‌ക്കെത്തുകയായിരുന്നു. ഇരുവരുടേയും കരുത്തില്‍ പവര്‍ പ്ലേയില്‍ 64 റണ്‍സെടുക്കാന്‍ മുംബൈക്ക് സാധിച്ചിരുന്നു. എന്നാല്‍ ഒമ്പതാം ഓവറില്‍ കൂട്ടുകെട്ട് പൊളിഞ്ഞു. ധിര്‍ ദിഗ്വേഷ് രാത്തിയുടെ പന്തില്‍ ബൗള്‍ഡായി. വൈകാതെ സൂര്യയും മടങ്ങി. തിലക് വര്‍മ (23 പന്തില്‍ 25) റിട്ടയേര്‍ഡ് ഔട്ടാവുകയും ചെയ്തതോടെ മുംബൈയുടെ പ്രതീക്ഷകള്‍ ഹാര്‍ദിക് പാണ്ഡ്യയില്‍ (16 പന്തില്‍ 28) മാത്രമായി. എന്നാല്‍ കരകയറ്റാന്‍ താരത്തിന് സാധിച്ചില്ല. ഹാര്‍ദിക്കിനൊപ്പം മിച്ചല്‍ സാന്റ്‌നര്‍ (2) പുറത്താവാതെ നിന്നു. നേരത്തെ, മികച്ച തുടക്കമാണ് ലക്‌നൗവിന് ലഭിച്ചത്. ഒന്നാം വിക്കറ്റില്‍ മാര്‍ഷ് – മാര്‍ക്രം സഖ്യം 76 റണ്‍സ് ചേര്‍ത്തു. വിഘ്‌നേഷാണ് മുംബൈക്ക് ബ്രേക്ക് ത്രൂ നല്‍കിയത്. മാര്‍ഷിനെ സ്വന്തം പന്തില്‍ ക്യാച്ചെടുത്ത് പുറത്താക്കുകയായിരുന്നു താരം. രണ്ട് സിക്‌സും ഒമ്പത് ഫോറും ഉള്‍പ്പെടുന്നതായിരുന്നു മാര്‍ഷിന്റെ ഇന്നിംഗ്‌സ്. പിന്നാലെയെത്തിയ നിക്കോളാസ് പുരാന്‍ (12), റിഷഭ് പന്ത് (2) എന്നിവര്‍ക്ക് തിളങ്ങാന്‍ സാധിച്ചില്ല. ഇരുവരും ഹാര്‍ദിക് പാണ്ഡ്യക്ക് വിക്കറ്റ് നല്‍കുകയായിരുന്നു. ഇതോടെ മൂന്നിന് 107 എന്ന നിലയിലായി ലക്‌നൗ. പിന്നീട് മാര്‍ക്രം – ആയുഷ് ബദോനി (19 പന്തില്‍ 30) സഖ്യം 41 റണ്‍സ് കൂട്ടിചേര്‍ത്തു. 16-ാം ഓവറിലാണ് കൂട്ടുകെട്ട് പൊളിയുന്നത്. ബദോനിയെ അശ്വനി കുമാര്‍ പുറത്താക്കി. വൈകാതെ മാര്‍ക്രമിനെ ഹാര്‍ദിക്കും മടക്കി. നാല് സിക്‌സും രണ്ട് ഫോറും നേടിയ മാര്‍ക്രം, രാജ് ബാവയ്ക്ക് ക്യാച്ച് നല്‍കുകയായിരുന്നു. ഡേവിഡ് മില്ലറിന്റെ (14 പന്തില്‍ 27) ഇന്നിംഗ്‌സാണ് ലക്‌നൗവിന്റെ സ്‌കോര്‍ 200 കടത്തിയത്. അബ്ദുള്‍ സമദ് (4), ആകാശ് ദീപ് (0) എന്നിവരാണ് പുറത്തായ മറ്റുതാരങ്ങള്‍. ഷാര്‍ദുല്‍ താക്കൂര്‍ (5), ആവേഷ് ഖാന്‍ (2) പുറത്താവാതെ നിന്നു. ഇത്തവണ നിരാശപ്പെടേണ്ടി വരില്ല! ബ്ലാസ്റ്റേഴ്‌സ് ആരാധകര്‍ക്ക് ഉറപ്പ് നല്‍കി പുതിയ കോച്ച് രണ്ടാം ജയം തേടിയാണ് ഇരുടീമുകളും ഇന്ന് ഇറങ്ങിയത്. പരിക്കേറ്റ രോഹിത് ശര്‍മ ഇന്നത്തെ മത്സരത്തില്‍ കളിച്ചിരുന്നില്ല. മത്സരത്തിന്റെ തലേന്ന് നെറ്റ് സെഷനില്‍ രോഹിത് ശര്‍മ്മയ്ക്ക് പരിക്കേറ്റതായി മുംബൈ ഇന്ത്യന്‍സ് ക്യാപ്റ്റന്‍ ഹാര്‍ദിക് പാണ്ഡ്യ സ്ഥിരീകരിച്ചു. ലക്‌നൗ സൂപ്പര്‍ ജയന്റ്‌സ്: എയ്ഡന്‍ മാര്‍ക്രം, മിച്ചല്‍ മാര്‍ഷ്, നിക്കോളാസ് പൂരാന്‍, റിഷഭ് പന്ത് (വിക്കറ്റ് കീപ്പര്‍/ക്യാപ്റ്റന്‍), ആയുഷ് ബഡോണി, ഡേവിഡ് മില്ലര്‍, അബ്ദുള്‍ സമദ്, ശാര്‍ദുല്‍ താക്കൂര്‍, ദിഗ്വേഷ് സിംഗ് രതി, ആകാശ് ദീപ്, ആവേശ് ഖാന്‍. മുംബൈ ഇന്ത്യന്‍സ് : വില്‍ ജാക്ക്‌സ്, റയാന്‍ റിക്കല്‍ടണ്‍ (വിക്കറ്റ് കീപ്പര്‍), സൂര്യകുമാര്‍ യാദവ്, ഹാര്‍ദിക് പാണ്ഡ്യ (ക്യാപ്റ്റന്‍), നമന്‍ ധിര്‍, രാജ് ബാവ, മിച്ചല്‍ സാന്റ്‌നര്‍, ട്രെന്റ് ബോള്‍ട്ട്, അശ്വനി കുമാര്‍, ദീപക് ചഹര്‍, വിഘ്‌നേഷ് പുത്തൂര്‍.
