വൃക്ക ക്യാൻസർ ബാധിക്കുന്നവരുടെ എണ്ണം ഇന്ന് ദിനം പ്രതി കൂടിവരികയാണ്. വൃക്കയിലെ അസാധാരണമായ കോശ വളർച്ചയിൽ നിന്നാണ് വൃക്ക ക്യാൻസർ അഥവാ വൃക്കകോശ കാർസിനോമ പ്രധാനമായും ഉണ്ടാകുന്നത്. ഇത് ട്യൂമറുകളായി രൂപപ്പെടുന്നു. വൃക്കയിലെ ക്യാൻസർ പലപ്പോഴും പ്രാരംഭ ഘട്ടത്തിൽ ലക്ഷണമില്ലാത്തതാണ്. പക്ഷേ അത് പുരോഗമിക്കുമ്പോൾ ശ്രദ്ധേയമായ ലക്ഷണങ്ങൾ പ്രകടമാകുമെന്ന് നാസിക്കിലെ എച്ച്‌സിജി മാനവത കാൻസർ സെന്ററിലെ മാനേജിംഗ് ഡയറക്ടറും സർജിക്കൽ ഓങ്കോളജി മേധാവിയുമായ ഡോ. രാജ് നാഗാർക്കർ പറഞ്ഞു. വൃക്കയിലെ ക്യാൻസറിന്റെ ലക്ഷണങ്ങൾ മൂത്രത്തിൽ രക്തം: മൂത്രം ചുവപ്പ് കലർന്നതോ തവിട്ടുനിറത്തിലുള്ളതോ ആകാം. ഈ ലക്ഷണം കണ്ടാൽ ഉടൻ തന്നെ ജോക്ടറെ കാണുക. വിട്ടുമാറാത്ത നടുവേദന: സ്ഥിരമായ ഒരു വശത്തുള്ള നടുവേദന വൃക്ക സംബന്ധമായ പ്രശ്നങ്ങളെ സൂചിപ്പിക്കുന്നു. ശരീരഭാരം കുറയൽ: ഭക്ഷണക്രമത്തിലോ പ്രവർത്തനത്തിലോ മാറ്റം വരുത്താതെ ശരീരഭാരം ഗണ്യമായി കുറയുന്നത് വൃക്ക കാൻസറിനോ മറ്റ് ക്യാൻസറുകൾക്കോ ഉള്ള ഒരു സൂചനയായിരിക്കാം. ക്ഷീണം: ദൈനംദിന ജീവിതത്തെ തടസ്സപ്പെടുത്തുന്ന നീണ്ടുനിൽക്കുന്ന ക്ഷീണം അടിസ്ഥാനപരമായ ആരോഗ്യ പ്രശ്നങ്ങളെ സൂചിപ്പിക്കാം. വീക്കം: അടിവയറ്റിലോ, കാലുകളിലോ, കണങ്കാലുകളിലോ ദ്രാവകം അടിഞ്ഞുകൂടുന്നത് വൃക്കകളുടെ പ്രവർത്തന വൈകല്യത്തെ സൂചിപ്പിക്കുന്നു. ഇടയ്ക്കിടെ മൂത്രമൊഴിക്കൽ അല്ലെങ്കിൽ നോക്റ്റൂറിയ: രാത്രിയിൽ അമിതമായി മൂത്രമൊഴിക്കുന്നതാണ് മറ്റൊരു ലക്ഷണം. പനി അല്ലെങ്കിൽ രാത്രി വിയർപ്പ്: രാത്രിയിൽ അമിതമായി വിയർക്കുന്നതാണ് മറ്റൊരു ലക്ഷണം. എങ്ങനെ പ്രതിരോധിക്കാം ? ജനിതകശാസ്ത്രം പോലുള്ള ചില അപകട ഘടകങ്ങൾ നിയന്ത്രണാതീതമാണെങ്കിലും നിരവധി ജീവിതശൈലി മാറ്റങ്ങളിലൂടെ അപകടസാധ്യത കുറയ്ക്കാം. ആരോഗ്യകരമായ ഭാരം നിലനിർത്തുക ; അമിതവണ്ണം നിരവധി രോഗങ്ങൾക്കുള്ള അപകട ഘടകമാണ്. സമീകൃതാഹാരവും പതിവ് വ്യായാമവും വണ്ണം കുറയ്ക്കും. പുകവലി ഒഴിവാക്കുക: പുകയില ഉപയോഗം വൃക്ക ക്യാൻസറിനുള്ള സാധ്യത ഗണ്യമായി വർദ്ധിപ്പിക്കുന്നു. പുകവലി ഉപേക്ഷിക്കുന്നത് നിരവധി രോഗങ്ങളിൽ നിന്ന് ശരീരത്തെ സംരക്ഷിക്കും. മദ്യം പരിമിതപ്പെടുത്തുക: അമിതമായ മദ്യപാനം വൃക്കകളുടെ ആരോഗ്യത്തിന് ഹാനികരമാണ്. ജലാംശം നിലനിർത്തുക: ധാരാളം വെള്ളം കുടിക്കുന്നത് വൃക്കകളുടെ പ്രവർത്തനത്തെയും മൊത്തത്തിലുള്ള ആരോഗ്യത്തെയും പിന്തുണയ്ക്കുന്നു. രക്തസമ്മർദ്ദം നിരീക്ഷിക്കുക: അനിയന്ത്രിതമായ രക്താതിമർദ്ദം വൃക്കകളുടെ ആരോഗ്യത്തെ ബാധിക്കാം. ഇത് കാൻസർ സാധ്യത വർദ്ധിപ്പിക്കും.
