പാർക്കിങ്ങിനെ ചൊല്ലി തർക്കം; കൊല്ലത്ത് കോടതി വളപ്പിൽ യുവാവിനെ ക്രൂരമായി തല്ലിചതച്ച് അഭിഭാഷകർ, കുടെയുണ്ടായിരുന്ന യുവതിക്കും പരിക്ക്

കൊല്ലം: വാഹനം പാർക്ക്​ ചെയ്യുന്നതിനെ ചൊല്ലിയുള്ള തർക്കം കോടതി വളപ്പിൽ സംഘർഷത്തിൽ കലാശിച്ചു. അഭിഭാഷകർ കൂട്ടം ചേർന്ന്​ മർദിച്ചതിനെ തുടർന്ന്​ യുവാവിന്​ സാരമായ പരിക്കേറ്റു​. കൂടെയുണ്ടായിരുന്ന ബന്​ധുവായ യുവതിക്കും പരിക്കുണ്ട്. യുവാവിന്‍റെ മർദനമേറ്റ അഭിഭാഷകനും പരിക്കുണ്ട്​. കൊല്ലം പള്ളിക്കൽ സ്വദേശി സിദ്ദീഖ് ​(36), കടക്കൽ സ്വദേശി ഷെമീന (33), അഡ്വ. ഐ.കെ.കൃഷ്ണകുമാർ എന്നിവർക്കാണ്​ പരിക്കേറ്റത്​. ഇവർ​ ജില്ല ആശുപത്രിയിൽ ചികിത്സതേടി​. കലക്​ട്രേറ്റ്​ അങ്കണത്തിലെ ആർ.ടി ഓഫീസിൽ പണം അടക്കാനെത്തിയതാണ്​ ഷെമീനയും അവരുടെ ബന്​ധുവും വാഹനത്തിന്‍റെ ഡ്രൈവറുമായ സിദ്ദീഖും. ഓഫീസിലെ ആവശ്യം കഴിഞ്ഞ്​ പുറത്തിറങ്ങിയപ്പോൾ തങ്ങളുടെ വാഹനത്തിന്​ പുറത്തിറങ്ങാൻ കഴിയാത്തനിലയിൽ വാഹനം കൊണ്ടിട്ട അഭിഭാഷകനോട്​ വാഹനം നീക്കിതരാൻ ആവശ്യപെട്ടിട്ടും അതിന്​ തയാറാകാതെ അദ്ദേഹം കോടതിയിലേക്ക്​ കയറിപോയതായി സിദ്ദീഖ്​ പറയുന്നു. ആശുപ​ത്രിയിൽ പോകേണ്ട ആവശ്യമാണന്ന്​ പറഞ്ഞ്​ കോടതിമുറിക്കുമുന്നിൽ വരെ പു​റകെ പോയി കെഞ്ചിയിട്ടും അഭിഭാഷകൻ ഗൗനിച്ചില്ലന്നും പരാതിയിൽ പറയുന്നു. ഏകദേശം അരമണിക്കൂറുകഴിഞ്ഞാണ്​ അഭിഭാഷകൻ തിരിച്ചെത്തിയത്​. തുടർന്ന്​ കാർ പാർക്ക്​ ചെയ്തതിനെ ചൊല്ലിയും നീക്കാൻ തയാറാകാത്തതിനെ ചൊല്ലിയും തർക്കമായി. കൈയാങ്കളി​യിലേക്ക്​ കാര്യങ്ങളെത്തിയ​തിനെ തുടർന്ന്​ കൂട്ടമായി എത്തിയ അഭിഭാഷകർ സിദ്ദീഖിനെ തല്ലി ചതച്ചു. പിടിച്ചുമാറ്റാൻ ശ്രമിച്ച ത​ന്നെയും ചില അഭിഭാഷകർ മർദിക്കുകയും അപമര്യാദയായി പെരുമാറുകയും ചെയ്​തെന്ന്​ ഷെമീന ‘മാധ്യമ’ത്തോട്​ പറഞ്ഞു. ​തനിക്ക്​ സുഖമില്ലാത്തതാണന്നും ആശുപത്രിയിൽ പോകാൻ വന്നതാണന്ന്​ പറഞ്ഞിട്ടും സ്ത്രീകളടക്കമുള്ള അഭിഭാഷകർ ഉപദ്രവിച്ചതായി അവർ പറഞ്ഞു. സംഭവത്തിന്‍റെ വീഡിയോ പകർത്താൻ ശ്രമിച്ച തന്‍റെ മൊബൈൽ പിടിച്ചുവാങ്ങി നശിപ്പിച്ചതായും ഷെമീന പറഞ്ഞു. ഇവർ വന്ന വാഹനത്തിനും കേടുപാടുണ്ടായി. ഇതിനിടെ സംഭവത്തിന്‍റെ വീഡിയോ പകർത്തിയ നാട്ടുകാരെ അഭിഭാഷകർ ഭീഷണിപെടുത്തി. അതേസമയം അഭിഭാഷകർക്ക്​ വാഹനങ്ങൾ പാർക്ക്​ ചെയ്യാനുള്ള സ്ഥലത്ത്​ വാഹനം പാർക്ക്​ ചെയ്തത്​ ചോദ്യം ചെയ്ത കൃഷ്ണകുമാറിനെ സിദ്ദീഖും ഷെമീനയും കൈയേറ്റം ചെയ്തതാണ്​ പ്രശ്നത്തിന്​ കാരണമെന്ന്​ ബാർ അസോസിയേഷൻ ഭാരവാഹികൾ പറഞ്ഞു.അഭിഭാഷകർ കോടതി ബഹിഷ്​ക്കരിക്കും കൊല്ലം: കോടതി വളപ്പിൽ പാർക്ക് ചെയ്തിരുന്ന അഡ്വ. ഐ.കെ. കൃഷ്ണകുമാറിന്‍റെ കാറിന്‍റെ കാറ്റൂരി വിടുകയും അദ്ദേഹത്തെ മർദ്ദിക്കുകയും ചെയ്ത സംഭവത്തിൽ പ്രതിഷേധിച്ച് കൊല്ലം ബാറിലെ അഭിഭാഷകർ വ്യാഴാഴ്ച കോടതി നടപടികളിൽ നിന്ന് വിട്ട് നിൽക്കുമെന്ന്​ കൊല്ലം ബാർ അസോസിയേഷൻ അറിയിച്ചു.കോടതി വളപ്പിൽ അനധികൃതമായി കാർ പാർക്ക് ചെയ്ത യുവാവും യുവതിയും തങ്ങളുടെ കാറിന് തടസ്സമായാണ് അഭിഭാഷകൻ കാർ പാർക്ക് ചെയ്തതെന്ന് പറഞ്ഞ്​ അഭിഭാഷകനെ കൈയേറ്റം ചെയ്തുവെന്നും ഒഴിഞ്ഞ് മാറിയ അഭിഭാഷകനെ വീണ്ടും അക്രമിക്കാൻ ശ്രമിച്ചപ്പോൾ മറ്റ് അഭിഭാഷകർ വന്ന് രക്ഷപ്പെടുത്തുകയായിരുന്നുവെന്നും അസോസിയേഷൻ ഭാരവാഹികൾ പ്രസ്​താവനയിൽ പറഞ്ഞു. ഇന്ന്​ രാവിലെ കൊല്ലം ബാർ അസോസിയേഷൻ അടിയന്തിര ജനറൽ ബോഡി യോഗം കൂടി തുടർ നടപടികൾ സ്വീകരിക്കുമെന്ന് പ്രസിഡൻ്റ് അഡ്വ. ഓച്ചിറ.എൻ. അനിൽകുമാർ, സെക്രട്ടറി അഡ്വ എ.കെ.മനോജ് എന്നിവർ അറിയിച്ചു.