സ്വകാര്യ കമ്പനികളുമായുള്ള വിപണിയിലെ മത്സരം മറികടക്കാൻ കുപ്പിപ്പാലുമായി മിൽമ.
ആദ്യമായാണ് കുപ്പിയിലടച്ച പാൽ മിൽമ വിപണിയിൽ എത്തിക്കുന്നത്. നിരവധി സ്വകാര്യ കമ്പനികൾ നിലവിൽ കുപ്പിപ്പാൽ വിൽക്കുന്നുണ്ട്.
മത്സരം കടുത്തതോടെയാണ് മിൽമയും കുപ്പിപ്പാലുമായി രംഗത്ത് എത്തുന്നത്. ആദ്യ ഘട്ടത്തിൽ തിരുവനന്തപുരം മേഖല യൂണിയൻ പദ്ധതി നടപ്പാക്കും. 10,000 ലിറ്റർ കുപ്പിപ്പാൽ നിത്യേന വിൽക്കാനാണ് ലക്ഷ്യമിടുന്നത്.
ഗുണമേന്മയുള്ള പുനരുപയോഗം നടത്താവുന്ന ഒരു ലിറ്ററിൻ്റെ പ്ലാസ്റ്റിക് കുപ്പിയിലാണ് പാൽ എത്തിക്കുക. കുപ്പി തുറന്ന് ഉപയോഗിച്ച ശേഷം ബാക്കി മൂന്ന് ദിവസം വരെ കേട് കൂടാതെ സൂക്ഷിക്കാം.
56 രൂപക്കാണ് ഒരു ലിറ്റർ കവർ പാൽ വിൽക്കുന്നത്. കുപ്പിപ്പാലിന് അറുപത് രൂപയ്ക്ക് മുകളിലാകും വിലയെന്നാണ് സൂചന. മികച്ച പ്രതികരണം ഉണ്ടായാൽ കൂടുതൽ പാൽ വിൽപ്പനക്കെത്തിക്കും.
