ഗൂഗിള്‍ പേയില്‍ പുതിയ മാറ്റങ്ങള്‍ വരുന്നു. ബില്‍ പേയ്‌മെന്റുകള്‍ക്ക് ഇനി മുതല്‍ കണ്‍വീനിയൻസ് ഫീ ഈടാക്കും. വൈദ്യുതി ബില്‍, ഗ്യാസ് ബില്‍ തുടങ്ങി എല്ലാ പേയ്‌മെന്റുകള്‍ക്കും ഇനി മുതല്‍ അധിക ചാർജ് ഈടാക്കും. ഡെബിറ്റ്, ക്രെഡിറ്റ് കാർഡുകള്‍ വഴി പണം അടയ്ക്കുന്ന ഉപയോക്താക്കള്‍ക്കാണ് ഈ നിരക്കുകള്‍ ബാധകമായി വരുന്നത്. എത്ര രൂപയാണോ ഇടപാട് നടത്തുന്നത് അതിന്റെ 0.5ശതമാനം മുതല്‍ ഒരു ശതമാനം വരെ ഫീസും ജിഎസ്ടിയുമാണ് ഈടാക്കുക.
ക്രെഡിറ്റ് അല്ലെങ്കില്‍ ഡെബിറ്റ് കാർഡ് പേയ്‌മെന്റുകള്‍ പ്രോസസ് ചെയ്യുന്നതുമായി ബന്ധപ്പെട്ട ചെലവുകള്‍ വഹിക്കുന്നതിനുള്ള ഒരു മാർഗമാണ് കണ്‍വീനിയൻസ് ഫീസെന്നാണ് ഗൂഗിള്‍ പേ നല്‍കുന്ന വിശദീകരണം. കണ്‍വീനിയൻസ് ഫീസ് എത്രയെന്ന് പേയ്മെന്റിന്റെ സമയത്ത് വ്യക്തമാക്കുമെന്നും ഗൂഗിള്‍ പേ അറിയിച്ചു. എന്നാല്‍ യുപിഐയില്‍ ലിങ്ക് ചെയ്ത് ബാങ്ക് അക്കൗണ്ടില്‍ നിന്ന് നേരിട്ടുള്ള ഇടപാടിന് ഫീസൊന്നും നല്‍കേണ്ടതില്ല.
ഗൂഗിള്‍ പേ പ്രത്യേക ചാർജുകള്‍ഈടാക്കുമെന്നുള്ള കാര്യം അറിയിക്കുന്നത് ഇതാദ്യമല്ല. കഴിഞ്ഞ വർഷം മൊബൈല്‍ റീചാർജുകള്‍ക്ക് മൂന്ന് രൂപ കണ്‍വീനിയൻസ് ഫീസ് ഈടാക്കുമെന്ന് കമ്ബനി അറിയിച്ചിരുന്നു. ആമസോണ്‍ പേ, ഫോണ്‍ പേ തുടങ്ങിയ മൊബൈല്‍ പേയ്‌മെന്റ് ആപ്പുകള്‍ നേരത്തെ തന്നെ സമാനമായി ചാർജുകള്‍ ഏർപ്പെടുത്തിയിരുന്നു.
