വനിതാ പ്രീമിയര്‍ ലീഗ്എലിമിനേറ്ററില്‍ ഗുജറാത്തിനെ തകര്‍ത്ത് മുംബൈ ഇന്ത്യന്‍സ് ഫൈനലില്‍! കലാശപ്പോരില്‍ ഡല്‍ഹി കാപിറ്റല്‍സിനെതിരെ

മുംബൈ: വനിതാ പ്രീമിയര്‍ ലീഗ് എലിമിനേറ്ററില്‍ ഗുജറാത്ത് ജയന്റ്‌സിനെ തോല്‍പ്പിച്ച് മുംബൈ ഇന്ത്യന്‍സ് ഫൈനലില്‍. മുംബൈ, ബ്രാബോണ്‍ സ്‌റ്റേഡിയത്തില്‍ നടന്ന മത്സരത്തില്‍ 47 റണ്‍സിനായിരുന്നു മുംബൈയുടെ ജയം. ടോസ് നഷ്ടപ്പെട്ട് ആദ്യം ബാറ്റിംഗിനെത്തിയ മുംബൈ നിശ്ചിത ഓവറില്‍ നാല് വിക്കറ്റ് നഷ്ടത്തില്‍ 213 റണ്‍സാണ് നേടിയത്. മറുപടി ബാറ്റിംഗില്‍ ഗുജറാത്ത് 19.2 ഓവറില്‍ 166 റണ്‍സിന് എല്ലാവരും പുറത്തായി. മൂന്ന് വിക്കറ്റ് നേടിയ ഹെയ്‌ലി മാത്യൂസാണ് ഗുജറാത്തിനെ തകര്‍ത്തത്. നേരത്തെ 77 റണ്‍സ് നേടി ബാറ്റിംഗിലും ഹെയ്‌ലി തിളങ്ങിയിരുന്നു. ഹെയ്‌ലിക്കൊപ്പം നതാലി സ്‌കിവറും 77 റണ്‍സ് അടിച്ചെടുത്തു. ശനിയാഴ്ച്ച നടക്കുന്ന ഫൈനലില്‍ മുംബൈ ഡല്‍ഹി കാപിറ്റല്‍സിനെ നേരിടും.  34 റണ്‍സെടുത്ത ഡാനിയേല ഗിബ്‌സണ് മാത്രമെ ഗുജറാത്ത് നിരയില്‍ എന്തെങ്കിലും ചെയ്യാന്‍ സാധിച്ചുള്ളൂ. ഫോബെ ലിച്ച്ഫീല്‍ഡ് (31), ഭാര്‍ട്ടി ഫുല്‍മാനി (30) എന്നിവരാണ് പിടിച്ചുനിന്ന മറ്റുതാരങ്ങള്‍. സിമ്രാന്‍ ഷെയ്ഖ് (17), തനുജ കന്‍വാര്‍ (16) എന്നിവരാണ് രണ്ടക്കം കണ്ട മറ്റുതാരങ്ങള്‍. മറ്റാര്‍ക്കും രണ്ടക്കം കാണാന്‍ സാധിച്ചില്ല. ഹെയ്‌ലിക്ക് പുറമെ അമേലിയ കേര്‍ രണ്ട് വിക്കറ്റ് വീഴ്ത്തി. ഷബ്‌നിം ഇസ്മയില്‍, സ്‌കിവര്‍ എന്നിവര്‍ക്ക് ഒരോ വിക്കറ്റുണ്ട്.  ‘ഷഹീദ് അഫ്രീദി എന്നോട് മതംമാറാന്‍ ആവശ്യപ്പെട്ടു’; ആരോപണവുമായി മുന്‍ താരം ഡാനിഷ് കനേരിയ നേരത്തെ, അത്ര നല്ലതായിരുന്നില്ല മുംബൈയുടെ തുടക്കം. സ്‌കോര്‍ബോര്‍ഡില്‍ 26 റണ്‍സ് മാത്രമുള്ളപ്പോള്‍ യഷ്ടിക ഭാട്ടിയ (15) പുറത്തായി. ഗിബ്‌സണിന്റെ പന്തില്‍ ഭാര്‍ട്ടി ഫുല്‍മാനിക്ക് ക്യാച്ച്. പിന്നീടാണ് മുംബൈ ഇന്നിംഗ്‌സിന്റെ നട്ടെല്ലായ കൂട്ടുകെട്ട് പിറന്നത്. ഹെയ്‌ലി – നതാലി സഖ്യം മൂന്നാം വിക്കറ്റില്‍ 133 റണ്‍സ് കൂട്ടിചേര്‍ത്തു. 17-ാം ഓവറിലാണ് ഗുജറാത്തിന് കൂട്ടുകെട്ട് പൊളിക്കാനായത്. ഹെയ്‌ലിയെ കഷ്‌വീ ഗൗതം മടക്കിയച്ചു. ബേത് മൂണിക്കായിരുന്നു ക്യാച്ച്. 50 പന്തുകള്‍ നേരിട്ട ഹെയ്‌ലി 10 ഫോറിന്റേയും മൂന്ന് സിക്‌സിന്റേയും സഹായത്തോടെയാണ് 77 റണ്‍സ് അടിച്ചെടുത്തത്.  പിന്നീട് ക്രീസിലെത്തിയ ക്യാപ്റ്റന്‍ ഹര്‍മന്‍പ്രീത് കൗര്‍ (12 പന്തില്‍ 36) നിര്‍ണായക പ്രകടനം പുറത്തെടുത്തു. നതാലിക്കൊപ്പം 39 റണ്‍സാണ് ഹര്‍മന്‍ കൂട്ടിചേര്‍ത്തത്. 19-ാം ഓവറിന്റെ അവസാന പന്തില്‍ നതാലി മടങ്ങി. 41 പന്തുകള്‍ മാത്രം നേരിട്ട താരം രണ്ട് സിക്‌സും 10 ഫോറും നേടി. അവസാന പന്തില്‍ ഹര്‍മന്‍ റണ്ണൗട്ടായി. നാല് സിക്‌സും രണ്ട് ഫോറും ഉള്‍പ്പെടുന്നതായിരുന്നു ഹര്‍മന്റെ ഇന്നിംഗ്‌സ്. മലയാളി താരം സജന സജീവന്‍ (0) പുറത്താവാതെ നിന്നു.