തിരുവനന്തപുരം: എസ്എസ്എല്‍സി, ഹയർ സെക്കണ്ടറി പരീക്ഷാ മൂല്യനിർണയ പ്രവർത്തനങ്ങൾ തകൃതിയായി മുന്നേറുകയാണെന്ന് വിദ്യാഭ്യാസ മന്ത്രി വി ശിവൻകുട്ടി. ഈ വര്‍ഷത്തെ എസ്എസ്എല്‍സി/ റ്റിഎച്ച്എസ്എല്‍സി/ എഎച്ച്എസ്എല്‍സിപരീക്ഷകളുടെ ഉത്തരക്കടലാസ്സുകളുടെ മൂല്യനിര്‍ണ്ണയം നടത്തുന്നതിനായി സ്ഥാനത്തൊട്ടാകെ 72 കേന്ദ്രീകൃതമൂല്യനിര്‍ണ്ണയ ക്യാമ്പുകളിലായി ഏപ്രില്‍ 26 വരെ രണ്ട് ഘട്ടങ്ങളിലായാണ് മൂല്യനിര്‍ണ്ണയ ക്യാമ്പുകളുടെ പ്രവര്‍ത്തനം ക്രമീകരിച്ചിട്ടുള്ളത്. ഏപ്രില്‍ മൂന്നിന് ആരംഭിച്ച ആദ്യഘട്ടം ഏപ്രില്‍ 11-ാം തീയതി അവസാനിക്കും. രണ്ടാംഘട്ടം ഏപ്രില്‍ 21-ാം തീയതി ആരംഭിച്ച് ഏപ്രില്‍ 26-ാം തീയതി അവസാനിക്കും. സംസ്ഥാനത്തെ എല്ലാ മൂല്യനിര്‍ണ്ണയ ക്യാമ്പുകളിലുമായി 952 അഡീഷണല്‍ ചീഫ് എക്സാമിനര്‍മാരെയും 8975 എക്സാമിനര്‍മാരെയും മൂല്യനിര്‍ണ്ണയത്തിനായി നിയോഗിച്ചിട്ടുണ്ട്. ക്യാമ്പുകളുടെ പ്രവര്‍ത്തനങ്ങള്‍ ഏകോപിപ്പിക്കുന്നതിന് 72 ക്യാമ്പ് ഓഫീസര്‍മാര്‍, 72 ഡെപ്യൂട്ടി ക്യാമ്പ് ഓഫീസര്‍മാര്‍ 216 ഓഫീസ് ജീവനക്കാർ എന്നിവരെ നിയോഗിച്ചിട്ടുണ്ട്. മൂല്യനിര്‍ണ്ണയത്തിനു ശേഷം ഓണ്‍ലൈന്‍ ആയി മാര്‍ക്ക് എന്‍ട്രി നടത്തുന്നതിന് 144 ഐ.റ്റി മാനേജര്‍മാരും 288 ഡാറ്റാ എന്‍ട്രി അധ്യാപകരും ഉള്‍പ്പെടെ ആകെ 720 പേരുടെ സേവനം മൂല്യ നിര്‍ണ്ണയ ക്യാമ്പുകളില്‍ ലഭ്യമാക്കിയിട്ടുണ്ട്. 2025 മാർച്ചിലെ ഹയർ സെക്കണ്ടറി പരീക്ഷകളുടെ ഉത്തരക്കടലാസ് മൂല്യനിർണ്ണയം നടത്താനായി 89 ക്യാമ്പുകൾ (സിംഗിൾ വാല്വേഷൻ ക്യാമ്പ്-63,ഡബിൾ വാല്വേഷൻ ക്യാമ്പ് -26) സജ്ജീകരിച്ചിട്ടുണ്ട്. ഹയർ സെക്കൻഡറി പരീക്ഷയുടെ ഉത്തരക്കടലാസ്സ് മൂല്യനിർണയം നടത്താനായി സ്കീം ഫൈനലൈസേഷൻ ഒന്നാം ഘട്ടം മാര്‍ച്ച് 14നും രണ്ടാം ഘട്ടം ഏപ്രിൽ രണ്ടിനും നടന്നു. 2025 മാർച്ചിൽ നടന്ന ഹയർ സെക്കൻഡറി പരീക്ഷയുടെ മൂല്യനിർണ്ണയം 57 വിവിധ വിഷയങ്ങൾക്ക് ആയി ഇരുപത്തി നാലായിരം (24000) അദ്ധ്യാപകരെ നിയമിച്ച് 89 ക്യാമ്പുകളിലായി പൂർത്തീകരിക്കും. 2025 ഏപ്രിൽ 3-ന് ആരംഭിച്ച മൂല്യനിർണ്ണയം മെയ് 10-ന് അവസാനിപ്പിക്കുവാനുള്ള നടപടികളാണ് സ്വീകരിച്ചു വരുന്നത്. ഒന്നാം വർഷ ഇംപ്രൂവ്മെന്റ് ഉത്തരകടലാസുകളുടെ മൂല്യ നിർണ്ണയമാണ് ആദ്യം നടത്തുന്നത്. ഒന്നാം വർഷ ഇംപ്രൂവ്മെന്റ് ഉത്തരകടലാസുകളുടെ മൂല്യ നിർണ്ണയം പൂർത്തിയാകുന്ന മുറയ്ക്ക് രണ്ടാം വർഷ ഉത്തരകടലാസുകളുടെ മൂല്യ നിർണ്ണയം നടത്തും. രണ്ടാം വർഷ ഉത്തരക്കടലാസുകളുടെ മൂല്യനിർണ്ണയം അവസാനിച്ച ശേഷം ഒന്നാം വർഷ മൂല്യനിർണ്ണയം ആരംഭിക്കും. ഒന്നാം വർഷ ഇംപ്രൂവ്മെന്റ് ഉത്തരകടലാസുകളുടെ എണ്ണം-669,726 ആണ് രണ്ടാം വർഷ ഉത്തരകടലാസുകളുടെ എണ്ണം-26,59,449 ആണ്. ഒന്നാം വർഷ ഉത്തരകടലാസുകളുടെ എണ്ണം-26,40,437 ആണ്. 2025 മെയ് മൂന്നാം വാരത്തിനുള്ളിൽ എസ് എസ് എൽ സി, ഹയർ സെക്കണ്ടറി പരീക്ഷകളുടെ ഫലപ്രഖ്യാപനം നടത്താൻ കഴിയുമെന്നാണ് പ്രതീക്ഷിക്കുന്നത്. മൂല്യനിർണയം സമയബന്ധിതമായി നടത്താനുള്ള എല്ലാ സജ്ജീകരണങ്ങളും ഏർപ്പെടുത്തിയിട്ടുണ്ടെന്നും മന്ത്രി വി ശിവൻകുട്ടി അറിയിച്ചു.
